رواية تزوجت طفلة

فعلًا ساعدني أقوم ادخل الحمام هو طول عمره كده لازم أعمل ايه ومش لازم أعمل ايه ودايما بيساعدني لما أحتاج مساعدة بحسه أب أخ وصديق لكن مش قادرة أشوفه زوجي خالص خصوصًا فرق السن 15 سنة فرق كبير جدًا 
صلى بيا صلاة الفجر وكان صوته حلو في القرآن أصل هو عارف لو نزل يصلي من هنا أنا هروح أنام من هنا كتر خيرك والله 

روحت فطرت بعدها ولبست دريس جميل عليه خمار أجمل عشان أروح الجامعة لا ولبست أحلى طقم عندي وحطيت ميك اب وروج ما أنا لازم أخلي حد يحبني عشان أخلص من سيف 
_ سيف سيف 
= نعم يا نور 
_ ايه رأيك في شكلي النهارده 
= قمر والله بس ناقص حاجة 
_ ايه هيي ؟! 
فجأة قرب مني وشال الحزام وطول الخمار شوية من ورا ومن قدام وايه ده طلع منديل ومسح المكياج والروج 
= كده شكلك أحلى 
_ لا شكلي أحلى ايه أنا كده شكلي أهبل ومحدش هيحبني 
= نور متخليش حد يحب شكلك وجسمك خليه يحب روحك عشان لو حابك عشان شكلك أول ما يلاقي أجمل منك هيسيبك لكن لو حب روحك عمره ما يسيبك لأن روحك مفيش زيها 

_ كل الرجاله مش بيفرق معاهم غير الشكل لو سألت واحد مواصفات زوجتك ايه يقول عايزها حلو شعرها كذا وعينيها كذا مفيش حد بيحب الروح 

= خلاص لو كان مفيش خليكي قاعده معايا أحسن ليكي والله 
_ لا أنا هلبس الحزام 
= خلاص براحتك بس مش هتروحي الجامعة وانتي لابساه 
_ ليه يا سيف كده بتحب ترخم عليا 
= دي مش رخامة الحزام ضيق وبيقسم جسمك كده أنا مش بحافظ عليكي كده أنا بعرضك للناس 
_ أنا زهقت بقالي سنتين عايشة معاك كلها تحكمات المفروض أعمل ايه ومعملش ايه أنا مش طفلة أنا عندي 20 سنة ومن حقي أعمل اللي أنا عايزاه 
= لا مش من حقك طالما أنتي لسه مراتي من حقي أحكم عليكي انتي مش حرة نفسك 
_ طيب ما تطلقني بقا وتحررني من سجنك 

= وهسيبك لمين ؟ مين هياخد باله منك ؟ 
_ أنا مش طفلة أنا أعرف أهتم بنفسي كويس 
= ما انا عارف إن انتي مش طفلة وتعرفي تهتمي بنفسك لكن المشكلة عندي أنا 
_ مش فاهمة 
= نور أنا بخاف عليكي من الهوا الطاير ازاى عايزاني أسيبك لوحدك 

_ خلاص بطل تتحكم فيا 
= انا مش بتحكم فيكي أنا بقولك اللي قال عليه ربنا ولو لقيتك بتعملي حاجه تغضب ربنا لازم أمنعك فورًا عشان أنا جوزك وهتحاسب عليكي يوم القيامة 
_ ايه علاقه ده بالحزام يا سيف ؟ ما أنا لابسه خمار 
= نور مواصفات اللبس الشرعي مش الجيب ولا الدريس ولا الخمار ولا الإدناء ولا العباية 
_ اومال ايه